In Zwolle doet ze een test met bredere fietsenstallingen bie het station. Bent ze late met. Ik heb al wel tien joar terugge schoelwichter met een Heinekenkrat op de vöarvörke noar de sportclub zien fietsen.
Earlijk is earlijk, wichter fietst teengwoardig niet mear noar de voetbal, die wördt döar de olders ebrach en dan is het natuurlijk zaak zo völle mogelijk parkearterrein rondom Tijenraan te hemm. Want anders goat ze oe doar an die fiets-stroate ollemoal mar in de berm stoane, det kan ok niet.
Ok bie het station van Roalte en Heino kump fors mear verharding um al die SUV’s kwiet te kunn.
Zelf heb ik een zesdehands fietse. (Ik was bie Kruper vöar een nieuwen en toen die höaren det ik d’r vöarnamelijk met noar het station zolle goan, zei e det die ik noe had nog goed zat was.) En die parkear ik altied keurig in de rekken. Hoe wieder ie achterin het fietsenrek zuukt, hoe groter de kans op een plekkie. Doar achteran kom ie ok nooit snel achtergeloaten fietsen teeeng, zoas ie die dicht bie de perrons wel völle ziet.
Laatst had ik een plekkie ‘evunn dicht bie de trein. Mar toen ik ’s oams terruge kwam was mien fietse weg. Noa ienig zuuk- en denkwerk gaf ik mie zelf een kans det de gemeente ‘m op hun werf an de Enkstroate near ezet zol he’mm, want det deun ze die dagen met verkeerd-parkearders. En det kloppen gelukkig. Noe vermoed ik det iemand mien fietse uut de rekken hef ehaand, zien fietse doar vöar in de plaatste ‘ezet hef en det ik vervolgens as schuldige mien fietse an de werf van de gemeente mosse ophalen. Ordnung muss sein!
Toch mar met de auto de volgende kear. Want die slept ze mie zo mar weg. En ruumte zat.
