Mark Rutte wul mie doen geleu’m det ik schuldig ben an criminaliteit as ik drugs gebruke. Want ik hoal met mien gebruuk het systeem in stand. Rutte zei det, toen criminelen een advocaat hadden dood’eschötten.
As ik de journalist was die de microfoon in handen had, woarin de minister president van ons land det zei, had ik ‘m evroagd of e det werkelijk serieus menen, hoe ie met zulk een löage kop met hersens de baas van dit land kunt wönn. Of – en die kans is ok groot – ik had ‘m gewoon met de microfoon öm de kop ‘esloane.
Wat een dommigheid. En wat een bangigheid.
Kiek, drugs gebruken is nie handig. En ik ben d’r vöar gebruuk terugge te dringen. Mar iets verbieden is pas zinnig as het logisch is. Met drank op, of bellend, achter het stuur, jonger de 18 an de drank: zulke verboden werkt. Of roken in de trein. Uuteindelijk hoalt de meesten zich d’r an en dan heb ie völle bereikt.
Det kan met drugs ok: onder bepaalde omstandigheden het gebruuk verbieden, en de productie onder strenge controle. Net as met drank, zal ik mar ze’ng.
Illegaal producearen hef dan gin zinne mear.
De pries daalt.
Inbrekken vöar een dagelijkse shot is verdwenen.
En nog völle mooier: al die illegale invoer is hillemoal niet illegaal mear.
Twee derde van de politie is noe met drugsgerelatearde zaken bezig, die kun ie zo ömmescholen tut schoelmeister.
Ik höar oe zeng: “Ja mar, wat vind Duutsland doar van dan?”
Wat kan oons det noe schellen. Doar bent wie toch niet vöar verantwoardelijk? Ie zult ziene trouwens det ze ons vöarbeeld snel volgt.
En nee, ie hoeft echt niet bange te weane vöar grotere verslaving. Det löp precies as bie alcohol. Mar doarnoast hoal ie zo völle geld oaver an minder inbraken, verzekeringsuutkearingen, opspoaring, rechtzaken, moordpartijen, det wule iedere verslaafde zowat persoonlijk kunt begeleiden.
The war on drugs goat wie allenig mar winnen as wie het legaliseart.
Denne
