Denne: Beste bestuurders in rijtje van swaffelen, Fortuyn en Voetbal Inside

Roalte is van de wekke köazen tut de beste decentraal bestuurde gemeente en de burgemeester tut de ien noa beste bestuurder van Nederland. Feest dus. Want det zeg wel wat. Mar wat? Ik ben d’r eam in’edökken.

Döar Denne van Knöldert

Een collega mut oe nominearen. Det giet via het systeem van de hemel in priezen. Degene die het verst richting hemel eprezen is giet van de longlist noar de shortlist, öm doar mar ‘ns een goeje platte uutdrukking vöar te gebruken. Vervolgens win ie bie mearderheid van stemmen. D’r is gin jury, b’r bent gin criteria, het aantal stemmen: that’s it.

Swaffelen werd op die maniere ooit woard van het joar. Swaffelen? Ja, det ie met oe geslacht langs een hekkie wrieft of langs een lantearnpoale.  Ik wus het ok niet. Mar Geen Stijl had det vöar mekare ekreeng. Voetbal Inside wun de Televier Ring en Gijp de NS Publieksprijs, ömdet Johan Derksen en Wilfred Genee een goeje PR-machine bent.

En Pim Fortuyn, de noar eigen zeggen pedofiele Marokkaantjes-liefhebber en volgens Maarten van Rossem de grootste politieke ramp die ons is oaverkomm’ werd, dank zei Pownews politicus van de eeuw.

Tut zo verre de context. Ik weet trouwens precies hoe die dinge goat. Ik ben al twee kear genomineard vöar de Trouw top 100. Döar kennissen, met ronkende teksten. Mar ik heb mien stemvee niet zo onder controle…

Bie een echte stemming met echte criteria had Roalte vermoedelijk ok ‘ewun as het giet öm gemeentes woar megastallen mear dan welkom bent, woar ziekmakende geitenstallen gin strobreed in de weg ‘eleg wördt en woar bestuurders bollentelers gifmengers nuumt mar ze niet verbiedt.

Wussen ule trouwens det de beste gehaktbal van Oaveriessel ok een kear in Roalte gebakken was. Det was ergens in 1990. De Twentsche Courant/Oaveriessels Dagblad deud die test en ik moch de jury weane in Salland. Heb ik mien stamkroegbaas Nols ezeg det ik een dag later zien gehaktballen kwam testen. Die waren ok wel heel lekker, mar de bierties d’r bie waren ok gratis, dus het cijfer werd een 10 in bienoa iedere categorie. Doar kon gin Twentse gehaktballenbakker teeng op.

Kortom: de beste bestuurder en de beste decentraal bestuurde gemeente zeg wel wat, det de bestuurders de kwaliteit hebt det d’r lovend, heel lovend oaver hun ‘eproat wördt en det doar dan heel völle mensen op stemt. Mar lös of ze goed of niet goed bestuurt, disse titel zeg doar niks oaver.

3 reacties

Klik hier om een reactie achter te laten

  • De vergelijking met swaffelen is in deze context een fantastische. Want dat is wat inderdaad heeft plaats gevonden bij deze ‘verkiezing’: bestuurlijk swaffelen.
    Wordt zeker vervolgd.

  • Moin Denne, ik wone pas sinds 1979 in Oaveriessel dus nim me mien plat niet kwoalik. Ik les oe stukkies meestentieds met vulle plezier. Mit dit stukkie bin ik het niet helemoal eens. Ie hebt alle geliek dat internetkiezingen oaver internet onbetrouwbaar kunnen zien. In dit geval mut ie et niet zien als verkiezingen van de beste bestuurde gemeente en bestuurder maor as een vörverkiezing. Uuteindelijk is het het blad Binnenlands Bestuur det bepoalt wie wint. As Heinoer, gedeporteerd naor Roalt mut ik oe zeggen det het zeer dudelijk is de letste zeg 10 jaore det de benadering van het college, de gemeenteroad en de ambtenoaren zeer positief veraanderd is, met een versnelling sinds Dadema hier is. Vrogger was het “wie bepoalt en oe schikt oe moar”. Noe is het toch vulle meer “Wie wollen dit en wah denkt oe daorvan”. Zie kunt niks doon an het feit det het noadeel van een democratie is dat net iederene tevreden gesteld kan worde. Toch altied better dan een eenpartiestaot. Ik zie Rutte niet groage maor toch wel liever dan Poetin. En twie partieën is ook net alles, zoals met Dolle Donald bliekt. Verder denke ik dat de terechte keuze ook bliekt uut het feit dat de keuning uut 355 Nederlandse gemeenten precies Roalte uitekozen hef om een voorbeeld te zien van burgerparticipatie. Of denk ie dat onze bebaorde vorst naor een beboarde burgemeester zocht hef?

    Good goan,
    Kees Huls (met excuses veur mien taalebruuk)

    • Dag Kees,
      oe taalgebruuk is helder!

      Ik heb mien kennis oaver de verkiezingen van de site van Binnenlands Bestuur:

      Hoe wordt iemand de Beste Bestuurder?
      In december 2019 nomineerden bijna 1.100 bestuurders, politici, secretarissen en griffiers uit provincies, gemeenten en waterschappen hun collega-bestuurders voor de titel. De prestaties en kwaliteiten van de bestuurders werden uitgebreid geprezen. Bijna 800 bestuurders werden minstens 1x genomineerd.

      Uiteindelijk vormden 10 genomineerden voor de beste lokale bestuurder en 11 genomineerden voor de subcategorieën het resultaat. Nieuwsgierig? Hier kun je terugzien wie er genomineerd werden.

      Begin januari 2020 was het tijd voor ronde 2: iedereen mocht stemmen op de genomineerden. In totaal lieten meer dan 14.000 mensen weten wie zij de beste bestuurder van 2019 vinden. Tijdens het Binnenlands Bestuur event Kompas 2020 zijn de 4 winnaars bekend gemaakt.

      Doar haal ik niet uut dat BB de slotkeus maakt.
      14.000 stemmen op 21 nominaties is ok nog ‘ns kear net niks.

      Ik ben trouwens blie det ie tevreden bent oaver het bestuur. Ik heb doar ok niks oaver ezegd overigens, mar volgens mie deze verkiezingen ok niet. Het was döarumme zo mooi ewes as d’r een échte verkiezint zol weane. As oe lovende woarden klopt, gooit Roalte dan ok hoge ogen. En dan meung ze terecht blie weane. Noe is det – vind ik – zelfs een bittie beschamend.